Kiž je z wětrom přišoł (baletna bajka)

pj, 02.02.2024
|
17 - 18 hodź.

wopisanje

Hoberske njewjedro docpě lěs nad Čornobóhom. Sylny wichor přiwěje rědkeho hósća zdaloka – papagaja z Brazilskeje – direktnje do hěty zeloweje chodojty, kiž tam ze swojim kocorom bydli. Na swojim dalokim lěće přez morjo je sej wón křidło zranił, tak zo dyrbi chwilu pola chodojty wostać. Wón zezna so z lěsnymi ptakami, kiž so runje na ptači kwas přihotuja a kwasnu rejku zwučuja. Prěnje zetkanje pak bu za papagaja jara zrudźace, přetož ptaki dźiwaja so přez jeho dźiwne zwonkowne a so jemu wusměja, dokelž njezamóže rejować. Za to móže pak wón wulkotnje spěwać a překwapi jich na tute wašnje. Cyła naležnosć so z tym skomplikuje, zo sroka, zakuzłana wot spěwa papagaja, na swojim kwasu z hawronom dwělować započina. Cuzy papagaj pak ani njewě, zo je sroka ptačokwasna njewjesta. Dokelž pomocliwa chodojta nětko w cyłej hrě tež hišće sobuměšeć poča a z tym haru powjetši, wuwije so na dožiwjenjach bohata stawizna, kiž so po wrótnej nocy w lěsu tola hišće derje skónči. Hawron w swojej njepowalnej wěrje do lubosće móže so ze swojej sroku na wulkotnym kwasnym swjedźenju woženić. A papagaj je při tym witany hósć – haj, na kóncu samo přećel.
Kiž je z wětrom přišoł (baletna bajka)

wjace informacijow

Serbski ludowy ansambl
Wonkowna Lawska 2
02625 Budyšin

dźěći, rejowane dźiwadło/balet

Kontakt zum Veranstalter

Sorbisches National-Ensemble